Иргэн төвтэй төрийн үйлчилгээг төлөвшүүлэх захиргааны шинэчлэл

Төрийн байгууллагын зүгээс иргэн бүрийн асуудлыг бодитоор шийдвэрлэхийн тулд бодлого, төсөл хөтөлбөр, төрийн үйлчилгээ, тогтолцоо зэргийг хэрэглэгчийн эрэлт хэрэгцээ (needs) нд нийцүүлэн хүргэх шаардлага гарч байгаа. Өмнө нь төрийн үйлчилгээг хүргэхэд байгууллагын зүгээс албан хаагчдад тав тухтай, хялбар арга хэлбэрийг ашиглахад анхаарч байсан нь өнөөдөр иргэн төрийн үйлчилгээг хүртэхэд амар хялбар, хүртээмжтэй, хэрэгцээнд нийцсэн үйлчилгээг хүргэхэд илүү анхаарч ажиллаж байгааг “Иргэн төвтэй төрийн үйлчилгээ” гэж ойлгож байна. БНСУ “Засаглал 3.0” бодлогын хөтөлбөрийг хэрэгжүүлж байгаа. Засаглал 3.0 (政 府 3.0) нь Засгийн газар олон нийтийн асуудлыг хамгийн сүүлийн үеийн технологийг ашиглан шийдвэрлэх гэсэн оролдлого гэж ойлгож болно. Энэ нь технологийг ашиглах буюу их өгөгдөл (big data), үүлэн тооцоолол (cloud computing), нийгмийн сүлжээ (social network), GPS болон газарзүйн мэдээллийн систем (GIS) зэрэг мэдээллийн технологийн шийдлийг ашиглан төрийн үйлчилгээг хүргэх явдал юм. Энэхүү өгүүллэгт “Засаглал 3.0” бодлогын хөтөлбөрийн хүрээнд хэрэгжүүлж буй төрийн үйлчилгээний талаар авч үзсэн болно.